मोबाइल रिचार्ज वर्सेज सुथरा ब्याह
एक बार की बात जब ये जिओ आया ना था और मोबाइल के रिचार्ज बहुत महंगे होया करदे। एक खपीटर के न्यू जच गयी अक तेरा ब्याह तो बस फेसबुक ही करवा सके है और बस दिन रात जुटा रहंदा।
फ्रेंड रिक्वेस्ट भेजन और छोरियां के फोटू लगाये बैठे छोरां नैं ढूंढ कै हटान मैं डेली दो जी बी डाटा का नास ठा दिया करता।
एक दिन जब वो फेर हर रोज की तरिया नेट रिचार्ज करवान गया तो वो मोबाइल की दूकान आला बोल्या रै भूतनी के जितने के तन्ने डाटा फूंक दिया है उतने में तो तेरा सुथरा ब्याह हो जांदा।
पेट्रोल की नपाई
हरियाणा देश का एक मात्र ऐसा राज्य हैं जहाँ पेट्रोल लीटरां नहीं दिनां के हिसाब तै भरवाया जावे हैं अक्सर लोग कहते मिल जावेंगे परसूं ऐ तो भरवाया था इतनी जल्दी क्यूकर समड गया।
महक कौनसी
कालेज में एक छोरी एक छोरे तै बोली मखाँ महक कसूती ठावै सै तू कौणसा साबण लावै सै।
छोरा बोल्या लत्ते धोण आला।
और बूझ ले अपने फूफे तै।
जेम्स बांड और देसी कुत्ता
एक बार की बात है जेम्स बांड हरियाणे में आ गया और उसके राह में एक कुत्ता आ गया और उसने कुत्ते के पाछे पै एक करडी सी लात बिठा दी और कुता उछल के साइड मैं को आया। इतने में जेम्स बांड बोल्या माई नेम इज बांड। कुत्ते के भी उसकी पिंडी सीध मैं आ गयी और उसने भी दांदरे सीधे उसकी पिंडी मैं बिठाए और कूद कै आया सामने और बोल्या मैं सूं पाड़ना। जेम्स बांड भाज लिया पियाऊं पियाऊं करदा कदे ये दूसरी पिंडी नै भी चेक कर ले।
गेहूंआ के पानी
एक उत से बालक के उलटे लक्षण देख के बाबू ने चानचक बूझ लिया और बेटे के चाल रह्या है छोरा अपने कालेज वाले लफंडरी फ्लो में था और बोल्या बाबू फोग्ग चाल रह्या है।
बाबू बस इसे इंतज़ार मैं सूखन लाग रह्या था उसने तुरंत एक कूँण मार कै वो नीचे गेरया और दो रहपटे सीधे रसीदे और चार बिठाई लात और गुद्दी पकड कै सीधा खड़ा करया और बूझया ईब बात के चाल रह्या है।
छोरे के होश आये ठिकाणे फेर बोल्या बाबू गेहूंआ मैं पाणी चाल रह्या है।
गूंठे के फंक्शन
रमलू एक दिन बैठा बैठा सोचन लाग रह्या अक मैं बालकपन मैं सोच्या करदा के यो गूंठा राम नै चूषण खातर दिया है लेकिन ईब समझ मैं आया है कि यो गूंठा तो राम जी नै मोबाइल पै स्क्रोल करण खातर दिया है।
सिलेंडर आला हाल
फिलोसोफी के एक मास्टर नै बबीता तै क्लास में बूझ्या। बबीता न्यू बता अक के दुनिया के सारे माणसां का थोबड़ा एक जीसा होता तो दुनिया मैं के हाल होता।
बबीता तुरंत जवाब देते हुई बोली मास्टर जी के हाल होता ? जमा गैस सिलैंडरां बरगा हाल होता कदे इस घर और कदे दूसरे के घर।
तूडी दे दे
घर के काम निबेड कै छोरी बस मैं बैठ कै कालेज जाण खातर ज्यों ही बस मैं चढी तो एक खपीटर बोल्या दिल ले ले। छोरी भी घणी दुखी थी और तुरंत बोली जाये रोये दिल दे कै के करेगा देनी हैं तो एक ट्राली तूडी के दे डांगर भूखे मरण लाग रहे हैं घरां।
बाबू का गर्व
एक बार एक छोरा कालेज मैं अपने दोस्त तै बोल्या : भाई मेरा बाबू जै बार भी टीवी मैं राहुल गांधी नै देखे हैं तो मन्ने सीने गैल ला कै कह्या करे हैं बेटा मन्ने तेरे पे गर्व है।
इतना सुण कै पहल्डा छोरा टेंसन मैं आ लिया और बूझन लाग गया रै तेरे बाबू नै किस चीज का गर्व सै तेरे उपर।
छोरा बोल्या : मेरा बाबू न्यू कहवे है चलो मेरला किसा भी है पर इस्ते तो घणा बढ़िया है।
ताई की जीत
एक बार की बात है एक ताई इलेक्शन मैं खडी हो गयी और एक रिपोर्टर उसके धोरे आ के सवाल बूझन लाग गया।
रिपोर्टर: ताई जी न्यू बताओ इलेक्शन लडन का ख्याल आपके मन में कैसे आया ?
ताई : देख भाई मेरा कई सालां का रिकार्ड है जब भी में तेरे ताऊ ते लड़ा करूँ ना आये बार जीत्या मैं ही करूँ सूं
सोमवार का बरत
स्वीटी कालेज में पढ्न आई तो एक खपीटर उसने बोल्या : चाल स्वीटी कैंटीन मैं ब्रेड पकौड़े खा के आवेंगे
स्वीटी बोली : भाई मेरा तो आज सोमवार का बरत सै
खपीटर के फेर भी चैन ना आया और बूझ बैठ्या : स्वीटी यो किस चीज का बरत है
स्वीटी भी भरी बैठी थी और न्यू बोली : बस तेरे जिसा लफंडर ना मिल ज्या।
पंजाबी हरियाणवी का मसला
एक बार की बात है एक पंजाब का आदमी रात बिरात रोहतक जिले मैं आ गया और गाम कानी जाता रास्ता गया भूल और उसके पाछे कुत्ते लाग लिए और वो उनते बचता बचता एक कुई मैं जा पड़ा।
चोखा कुई सूकी थी और उसके घणी चोट नहीं लागी और कुत्ते जमा कुई के पाटडे पै कट्ठे हो कै भोकन लाग गए एक खपीटर सेट होया गाम कानी जावे था उसनै यो कुई आला प्रोग्राम देख्या और समझ गया के कुत्तयाँ नै कोई भला मानस कुई मैं धकेल दिया है।
वो कुई के पाटडे पै आ कै बोल्या रै कुण सा है : भीतर तै आवाज आई : असीं हाँ
खपीटर बोल्या भाई एक आधा होता तो काढ भी देते यो अस्सी नब्बे कोनी काढ़े जावें आपस मैं ही मिलके लिकड़ ल्यो।
केजरीवाल की स्ट्रेटेजी
केजरीवाल नै आजतक सारे नेता ताए लेकिन एक बार भी योगी आदित्यनाथ के बाबत एक शब्द नहीं बोल्या क्यूंकि वो जाणे है क्योंकि मोदी और योगी में फर्क है।
मोदी जी का नियम है पहले मुलाकात फिर बात और फिर जरूरत पड़े तो लात।
योगी जी का नियम है पहले लात फिर लात और फिर लाते लात।
ब्याह का डायलोग
हरियाणा में बारात में महिलाएं नहीं जाती हैं बारात के गांव में पहुँचने पर उनपर बहुत सारे डायलॉग्स की बौछार की जाती हैं जिनमें से एक यह भी है : आधी रोटी खांड बिना सारे बराती राण्ड बिना
नकली फेसबुकआई.डी. के साइड इफ़ेक्ट
आजकल कई छोरे तो छोरी की फेस बुक आई डी बना के इतने मशगूल हो ज्यां हैं जब उनकी मां बुलावे है तो कैहवैंगे
आई माँ
पसंद का राज
पप्पू का पड़ोस मैं ही ब्याह हो गया और एक दिन वो अपनी बहू तै बूझ बैठ्या भागवान आपने मेरे अंदर क्या देखा जो ब्याह खातर हाँ बोल दी
बहू बोली : जी मैंने आपको कई बार बर्तन मांजते हुए देख्या था और बस इसी बात से मैं तैयार हो गयी।
मेहमान का सवाल
एक बार की बात है एक घर मैं एक मेहमान आ गया और घर वालों नें उसकी सेवा पानी बैठाने के लिए चाय बिस्कुट और भुजिया वाला प्रोग्राम रच दिया
घर का जो सबसे बड़ा लडका था वो अंदर से निकल के आया तो मेहमान उससे बोल्या : तो बेटा आगै के करण का इरादा सै? बालक चुपके से उसके नज़दीक आया और उसके कान में बोल्या बस : थारे लिकडते ऐ इन बिस्कुट, ठंडे अर भुजिया का बक्कल तारणा सै।
फ्यूचर टेन्स
टीचर ने क्लास में पढ़ाते हुए एक बालक से पूछा बेटा बाहर तेज हवाओं के साथ वर्षा हो रही है इसे फ्यूचर टेन्स में बताओ
बालक : जी बस बिजली जान आली है
रेलवे बोर्ड का इंटरव्यू
रेलवे की भर्ती के इंटरव्यू चलने लग रहे थे एक एक हरियाणवी नम्बर आ गया
इंटरव्यू लेनिया : अगर दो रेलगाड़ियाँ एक लाइन पर आ गयी तो क्या करोगे ?
छोरा :- जी, रेड लाइट दिखाऊंगा !
इंटरव्यू लेनिया :- रेड लाइट न हो तो ?
छोरा :- टोर्च दिखाऊंगा !
इंटरव्यू लेनिया :- टोर्च न हो तो ?
छोरा :- अपनी रेड शर्ट उतार कर दिखाऊंगा !
इंटरव्यू लेनिया:- शर्ट भी रेड न हुयी तो ?
छोरा:- फिर मैं अपने बुआ के छोरे को विडियो कालिंग करूँगा
इंटरव्यू लेनिया :- हैं, वो क्यों ?
छोरा :- जी, उसने कभी ट्रेनों की टक्कर नहीं देखी कम तै कम वो तो राजी हो ज्यागा
यूनिवर्सल रिश्तेदारी
वैसे तो हरियाणा वाले रिश्तेदारी काढन मैं सबते आगे मिला करें हैं फिर भी कुछ स्टैण्डर्ड यूनिवर्सल रिश्तेदारियां काढ राखी हैं जैसे ?
पुलिस आले ‘मामे’
बिजली आले ‘साले
फ्लाईंग आले ‘भाती
जज साहब डूब कै मर जाओ
एक कैदी की दो तीन दिन कुछ केसो में लगातार एक ही जज के पेशी लग गयी
जज न्यू बोल्या : तू तीसरी बार अदालत आया है, तने शर्म कोनी आती?
आदमी: तू तो रोज़ आवे है, तने तो खसम डूब के मर जाना चाहिए ।
नैन मट्टका
रामफल के घर भैंस का ग्राहक आ गया और रामफल ने मांगे पूरे पच्हचीस हज़ार
ग्राहक भैंस का मुआयना करके बोल्या : थारी भैंस की एक आंख तो खराब सै, फेर भी तू इसके 25 हज़ार रुपये मांगन लाग रह्या से
रामफल बोल्या : रै भूतनी के तन्नै भैंस दूध खात्तर चाहिए या नैन-मटक्का करन खात्तर